⁦✌️⁩��مصدرك الاول للمعرفه

Post Top Ad

Your Ad Spot

الأحد، 8 ديسمبر 2019

الانتحار

تعامل الناس بشكل عام مع الناس اللي بيفكروا في الأنتحار او حتى اللي جربوا وفشلوا، كفيل ان يخلي الشخص يصر على الفكرة ولو فشل يحاول من جديد، بسبب الفقر العاطفي والديني دايمًا بتتلخص الفكرة في ان الشخص اللي بيفكر بالطريقة دي يا عنده مشكلة عاطفية يا بعيد عن ربنا، الفهم المحدود لخبايا النفس البشري، من اسباب سطحية الردود واتخاذ المواقف الجادة .. 

في رواية "لن ينتهي البؤس" اللي هتنزل قريب وبالمناسبة اسمها مقتبس من رسالة انتحار العظيم فينيست فان جوخ -اصرارنا على الاسم دا كان لرغبتنا في خروج عمل واقعي اجتماعي مش عاطفي او بيتكلم عن العلاقات العاطفية بس-  واثناء رحلتنا في البحث والتوثيق عن اسباب رغبة كبيرة من شباب الجيل الحالي في الخلاص او حتى الأسباب اللي دفعت شباب في عمرنا يخطوا الخطوة دي.. اكتشفنا ان اغلب المنتحرين كانوا بيعبروا عن رغبتهم بطريقة مختلفة لكن كانت الردود على رغبتهم مزعجة اكتر من الرغبة نفسها ..

من ضمن الشخصيات وأبطال الرواية كنت بتكلم مع بنت عن تجربتها في الأنتحار وعن مأساة ما بعد التجربة دي قالت نصًا
 " انت مش محور الكون، لو شايف ان العلاقات العاطفية او العلاقة مع الخالق مجرد اسباب كافية ان اي شخص ممكن ينتحر، في مليون سبب يمكن أصدق من الأسباب المعروفة، شعور الغربة وانك دايمًا حاسس انك غريب في كل مكان دا من ضمن الأسباب، الوحدة وشعور ان ورغم الزحمة اللي حواليك انت فارغ تمامًا من جواك دا سبب كافي جدًا، شعور انك مدرك وواعي جدًا للحياة في وقت كل العالم بيتعامل بسطحية من ضمن الأسباب، الأسئلة الوجودية اللي ملهاش اجابة من ضمن الأسباب، الفقد او شعور انك سيء الحظ من ضمن الأسباب، الأضطهاد والعنصرية والسخرية كذلك، الفشل المتكرر وانك مش عارف تنجح في اي شيء سبب بردو، الملايكة اللي حوالينا واضطهادهم لافعالنا وتصرفاتنا واحساس انك الشخص السيء الوحيد في الحياة من ضمن الاسباب بردو.. حرب الشخص الشرسة مع نفسه.. الخ.. في مليون سبب للأنتحار وكلهم اسباب مقنعة للشخص نفسه، حتى لو مشكلة تافهة بالنسبة لك فـ ممكن تكون المشكلة دي بالنسبة لي أهم من مشاكل العالم الخارجي" ..

واحنا بنراجع السيرة الذاتية لبعض المنتحرين اكتشفنا ان في جزء منهم بيتلخص دوره في "البهلوان" او بمعنى اوضح هو الشخص الفكاهي اللي تشوفوا تحس انه مقبل على الحياة بشكل يخليك تشك انه شخص عايش في هدوء وسعادة للأبد، الشخص اللي بيخليك تضحك رغم كل همومك..

كذلك الشخص الطيب اللي بيساعد الناس كلها ومعندهوش اي مشكلة يطمن العالم وهو في عرض قشة يتعلق ويطمن بيها .. هو اللي بيسمعك دايمًا ويهون عليك ويقف جمبك وصديق للناس كلها ..

انت مش مستوعب ان الأنتحار مش دايمًا مرتبط بالصورة الخارجية للشخص ..

بمناسبة اليوم العالمي لمحاربة الأنتحار ..

فعليًا وحسب الأحصائيات ٢٥٪ من الناس اللي في حياتك فكروا او جربوا في الأنتحار، رقم مفجع وكارثي وملهوش اي تفسير غير ان العالم بشكل عام والظروف اللي بيمر بيها من حروب واضطهادات وقمع وجهل كلها ظروف غير ملائمة للحياة الانسانية .. كذلك ارتفاع نسبة الأنتحار في الشرق الاوسط بعد ثورات الربيع العربي الحزين يدل ان المسألة بعيدة كل البعد عن العلاقات الأجتماعية او الدينية..

الخلاصة/
ان اللي حوالينا ليهم دور اساسي وفعلي في  الخطوة دي.. انا مش مؤمن ان في حد بيجرب ينتحر ويفشل ايماني ان اللي عايز ينتحر مش بيفشل لكن هو بيصرخ بطريقة ما وبيستنجد بيهم وردود الفعل بتكون سبب في تثبت ونجاح التجربة او الابتعاد عنها تمامًا، وطبعًا لأننا في مجتمع عربي جاهل في التعامل مع النفس البشرية فـ أغلب الردود بتتلخص في " صلي .. قرب من ربنا .. انت عايز تموت كافر.. الموضوع مش مستاهل كل دا.. انت ازاي اتصرفت كدة .. انت ناقصك اية ما كلنا معاك وجمبك.. وهكذا" .. مع ان كل الردود دي ردود مزعجة مستهلكة بتثبت الفكرة جوة الشخص وبتزيد جواة الرغبة.. لو تعرف حد في حياتك جرب او بيفكر في خطوة زي دي ياريت بلاش دورك يتلخص في النصح قد ما يكون في دورك في الأستماع والقرب.. ياريت بلاش ردود بتتلخص في العتاب واللوم والأضطهاد والحكم على التصرفات .. لو معندكش القدرة انك تساعده صح بدراسة ووعي حاول تخلي يروح لأستشاري نفسي.. اللي بيوصل للمرحلة بيكون في عرض كلمة يستنجد بيها لو مش عارف تنقذه بيها.. متبقاش سبب في انك تثبت الرغبة جواة.. وما خفي كان أعظم .
الانتحار

ليست هناك تعليقات:

إرسال تعليق

Post Top Ad